អារ៉ាប៊ីសាអូឌីត៖ ក្លិបបាល់ទាត់ Al Nassr នៃលីគកំពូលអារ៉ាប៊ីសាអូឌីតបានប្រកាសជាផ្លូវការនៅលើគេហទំព័រហ្វេសប៊ុក និង Twitter របស់ខ្លួនជាផ្លូវការ អំពីការនាំយកខ្សែប្រយុទ្ធប្រធានក្រុមជម្រើសជាតិព័រទុយហ្គាល់ Cristiano Ronaldo មកចូលរួមជាមួយក្លិបជាផ្លូវការ ជាមួយកិច្ចសន្យារហូតដល់ឆ្នាំ ២០២៥។

សាមីកីឡាករ Ronaldo ផ្ទាល់ក៏បានបញ្ជាក់តាមរយរូបថតកាន់អាវក្លិប Al Nassr ជាមួយលេខ ៧ ជាការបង្ហាញពីការចូលរួមជាមួយក្លិបនេះក្នុងតម្លៃពលកម្ម ២០០លានអឺរ៉ូក្នុងមួយឆ្នាំ ដែលជាតម្លៃប្រាក់នឿយហត់ខ្ពស់បំផុតក្នុងប្រវត្តិសាស្រ្តបាល់ទាត់។ Ronaldo បច្ចុប្បន្នមានវ័យ ៣៧ឆ្នាំ បានក្លាយជាកីឡាករដែលគ្មានក្លិបប្រកបអាជីពកាលពីខែមុន ក្រោយពេលដែលក្លិប Man Utd ប្រកាសផ្តាច់កុងត្រាក្រោយពីមានបញ្ហាចម្រូងចម្រាស់កើតឡើងបន្ទាប់ពីលោកបានកិច្ចសម្ភាសន៍មួយជាមួយអ្នកសារព័ត៌មាន Piers Morgan។

យោងតាមប្រភពសារព័ត៌មានកីឡាអេស្ប៉ាញ តាមពិតទៅកិច្ចសន្យារបស់ Ronaldo ជាមួយ Al Nassr មានរយៈពេល ៧ឆ្នាំ ប៉ុន្តែ Ronaldo មានកាតព្វកិច្ចលេងត្រឹមតែ ២ឆ្នាំកន្លះសិនប៉ុណ្ណោះ នឹងនៅសល់ប៉ុន្មានគេនឹងក្លាយទៅជាទូតតំណាងក្លិប និងអាចជាតំណាងបាល់ទាត់អារ៉ាបប៊ីសាអូឌីតតែម្តង ខណៈប្រាក់ឈ្នួលនឹងមានការកើនឡើងបន្ថែម។ ក្នុងបេសកកម្មជាទូតតំណាងបាល់ទាត់អារ៉ាប៊ីសាអូឌីតនេះ នឹងជាការជួយដល់អារ៉ាប៊ីសាអូឌីតក្នុងកិច្ចសហការជាមួយអេហ្ស៊ីប និងក្រិច ក្នុងការដេញថ្លៃជាម្ចាស់ផ្ទះសម្រាប់ព្រឹត្តិការណ៍ World Cup ឆ្នាំ២០៣០៕